ರಾಣಾ, ದಿಲ್‌ ಪಸಂದ್‌, ಯಶೋದಾ : ನಾಳೆ ಬಿಡುಗಡೆಯಾಗಲಿವೆ 8 ಕ್ಕೂ ಹೆಚ್ಚು ಸಿನಿಮಾಗಳು..!

ಬೆಂಗಳೂರು : ಸಿನಿ ಪ್ರೇಕ್ಷಕರು ಶುಕ್ರವಾರ ಯಾವಾಗ ಬರ್ತಪ್ಪಾ.. ಯಾವ ಹೊಸ ಸಿನಿಮಾ ರಿಲೀಸ್‌ ಆಗುತ್ತಪ್ಪಾ.. ಅಂತ ಕಾಯ್ದು ಕುಳಿತಿರುತ್ತಾರೆ. ಈ ವಾರವೂ ಸಹ ಸಿನಿಮಾ ಅಭಿಮಾನಿಗಳಿಗೆ ಭರ್ಜರಿ ಸಿನಿ ಭೋಜನ ಕಾಯ್ದಿದ್ದು, ಒಂದೇ ದಿನ ಹಲವು ಸಿನಿಮಾಗಳು ಒಟ್ಟಿಗೆ ಚಿತ್ರಮಂದಿರಕ್ಕೆ ಕಾಲಿಡಲಿವೆ.

ಹೌದು, ನಾಳೆ ಶುಕ್ರವಾರ ಸಿನಿಪ್ರೇಮಿಗಳಿಗೆ ಹಬ್ಬದ ದಿನ. ಹೊಸ ಸಿನಿಮಾಗಳನ್ನು ನೋಡುವ ಕಾತರತೆಯಿಂದ ಪ್ರೇಕ್ಷಕರು ಕಾಯುತ್ತಿದ್ದಾರೆ. ಚಿತ್ರಮಂದಿರಗಳಲ್ಲಿ ʼಕಾಂತಾರ’ದ ಹವಾ ಕಡಿಮೆಯಾಗಿಲ್ಲ. ಇದರ ನಡುವೆ ಕನ್ನಡದಲ್ಲಿ ರಾಣಾ, ದಿಲ್‌ ಪಸಂದ್‌, ಓ, ಹುಬ್ಬಳ್ಳಿ ಡಾಬಾ, ಯೆಲ್ಲೋ ಗ್ಯಾಂಗ್ಸ್​ ಸಿನಿಮಾಗಳು ಬಿಡುಗಡೆ ಆಗುತ್ತಿವೆ.

ಇದನ್ನೂ ಓದಿ: ವಯಸ್ಸು ಹೆಚ್ಚಿದಂತೆ ಮೀರಾ ಅಂದವೂ ದಿನದಿಂದ ದಿನಕ್ಕೆ ಹೆಚ್ಚುತ್ತಲೇ ಇದೆ..!

ಡಾರ್ಲಿಂಗ್‌ ಕೃಷ್ಣ, ಮೇಘಾ ಶೆಟ್ಟಿ ಅಭಿನಯದ ದಿಲ್‌ ಪಸಂದ್‌ ಟ್ರೈಲರ್‌ ಮೂಲಕವೇ ಅಭಿಮಾನಿಗಳಲ್ಲಿ ಕುತೂಹಲ ಮೂಡಿಸಿದೆ. ಸಿನಿಮಾದಲ್ಲಿ ಡಾರ್ಲಿಂಗ್​ ಕೃಷ್ಣ, ನಿಶ್ವಿಕಾ ನಾಯ್ಡು, ಮೇಘಾ ಶೆಟ್ಟಿ ಮುಖ್ಯ ಪಾತ್ರಗಳಲ್ಲಿ ಕಾಣಿಸಿಕೊಂಡಿದ್ದಾರೆ. ಇನ್ನು ರಾಣಾ ಸಿನಿಮಾ ಕೂಡಾ ನಾಳೆ ಅಂದ್ರೆ, ನ.11ರಂದು ಬಿಡುಗಡೆಯಾಗಲಿದೆ. ಶ್ರೇಯಸ್‌ ಮಂಜು ಮತ್ತು ರೀಷ್ಮಾ ಈ ಚಿತ್ರದಲ್ಲಿದ್ದಾರೆ. ಇನ್ನು ಲವ್‌ ಸಿನಿಮಾಗಳ ನಡುವೆ ವಿಶಿಷ್ಟ ಶೀರ್ಷಿಕೆ ಮೂಲಕ ಓ ಎಂಬ ಸಿನಿಮಾ ಬಿಡುಗಡೆಯಾಗಲಿದೆ. ಮಿಲನಾ ನಾಗರಾಜ್​ ಮತ್ತು ಅಮೃತಾ ಅಯ್ಯಂಗಾರ್​ ಈ ಸಸ್ಪೆನ್ಸ್‌ ಥ್ರಿಲ್ಲರ್‌ ಸಿನಿಮಾದಲ್ಲಿದ್ದಾರೆ. ʼಯೆಲ್ಲೋ ಗ್ಯಾಂಗ್ಸ್​ʼ ಕೂಡ ನಾಳೆ ಬಿಡುಗಡೆಯಾಗಲಿದೆ.